Një San Cu për Kosovën

Gjenerali i njohur kinez i artit të luftës San Cu, ka thënë se suksesi apo dështimi në betejë është meritë kryekëput e udhëheqësit.

Ndoshta e keni dëgjuar storien ku (sipas legjendës) San Cu shkon në pallatin e perandorit kinez dhe në mes tjerash i thotë se është i aftë që secilin individ me e shndërru në ushtar. Perandori si duke u tallur i thotë – a mundesh edhe këto shërbëtoret e pallatit me i ba ushtare?

Sigurisht! – u përgjigj San Cu.

Çka bani San Cu?! I ndau ato në dy grupe, prej secilit grup e zgjodhi nga një udhëheqëse. I shpjegoi instruksionet dhe detyrat që priten prej tyre, që kishin të bënin me demonstrim të aftësive të caktuara ushtarake që ato duhet ti përvetësonin, i përsëriti edhe njëherë, derisa u sigurua se ato i kuptuan mirë.

Kur erdhi koha që ato të dëshmonin veten, San Cu kërkoi nga dy udhëheqëset e grupeve që të japin urdhërin për të filluar. Shërbëtoret e pallatit vetëm qesheshin në mes vete. E kishin marrë me lojë e shaka krejt këtë punë.

Atëherë, San Cu nxori shpatën nga brezi dhe ja u fluturoi kokën dy udhëheqëseve. Në vend të tyre caktoi dy udhëheqëse të tjera...

Pa pesë nevojë me e zgjatë më shumë, thuhet se shërbëtoret pas këtij rasti mahniten të pranishmit me përformancen e tyre.

Filozofia që të kërkohet përgjegjësi nga koka, duhet të aplikohet në sistemin e arsimit (dhe jo vetëm) tek ne. Secili udhëheqës, nga kryeministri, ministri, drejtorë, deri te mësimdhënësi duhet ta kenë të qartë se cilat janë rezultatet qe duhet t’i mbërrijnë. Në të kundërt i shkon koka jo, por udhëheqësi që nuk i mbërrin ato rezultate minimale që priten prej tij, nuk do të duhej të qëndronte më në pozitën prej ku e pengon progresin.

Shpesh e dëgjojmë arsyetimin se, shoqëria, mentaliteti duhet të ndryshojë - pa ndryshuar mentaliteti popullor nuk mund të bëhet asgjë. Me një fjalë, pritet ndryshim me një qasje nga poshtë-lart. Pritet që të ndodhë paraprakisht ndonjë evolucion kulturor apo biologjik, që do ti duheshin ndoshta mijëra vite prova e dështime, që të shpresohet pastaj se do t'i vendoste gjërat në vendin e vet. Përkundrazi, jo qasje nga bishti te koka, por e kundërta, një qasje sipas dizajnit inteligjent nga koka, një sistem i kontrollit të cilësisë dhe përgjegjësisë, në arsim apo sferat tjera.